المشهد الـ 19

راكبين التاكسي ..
بيتكلم صالح 
_ بس ايه الشياكة اللي انتي فيها يا روح دي ؟
_ بتمد ايدها على كتفه، خليك في روحك
اصل انا ديماً بعرف ناس تجيب لورا، ويبهدلوا حالي كده
بيضحك هو ..
_ مكنتش اعرف اني مُهم عندك كده
_ لأ، وغير انهم يجيبوا ورا، أغبية .. شوفت الحظ .
_ لأ بس طلعتي بتحبيني
_ ربنا يشفيك يا صالح، ساعة في المطار لسعتك اومال لو سافرت بقى كنت حستلمك من العباسية ؟
انت فاقد حُب او حنان يا حبيبي ؟ قولي متتكسفش !
_ بطلي هزار يا روح حبة
_ امممم حفكر
بتبص على ازاز الشباك واكنها بتتكلم جد
_ لا والله
بتضحك جامد
_ مش بعرف امثل كتير قُدامك يا غلس .

_ مانا عارف، انا جامد برضو

بتقرب منه ..

_ هو انا مش قولتلك تبطل الكلام اللي ملوش معاني ده ؟

_ انا قولت ايه ؟

بتخن صوتها بتريقة واكن حد عجيب بيتكلم

_ انا جامد برضو

_ انا قولت كده ؟

_ اها، قال يا فيروز ولا مقالش

بتبتسم فيروز

_ اها قال 

_ اصلاً انتي نايمة جاية تفوقي وتفتني عليا يعني

_ لا انا بتفرج عليكوا

_ اتفرجي يا ستي خلتينا فُرجة اهو

_ استنى بس اهدي متغيرش الموضوع

_ هههههه، انا قولت * بيقلدها * انا جامد برضو

_ متستعبطش، أقصد على الكلمة

_ خلاص متكبسنيش قدام الناس

*بيوطي صوته*

_ مكسفكش قُدام الناس، ناس مين ؟

_ برافو .. 

بيكلم السواق

_ سمعت هي قالت ايه ؟

بيطلع ايده من الشباك يشاور للراجل اللى في العربية جمبه

_ ازيك عامل ايه ؟ سمعتها ؟

روح وفيروز ميتين من الضحك عليه

شوية وكانوا وصلوا تحت البيت

_ هات الشُنط، مش كفاية انا صاحبتك لا وكمان اخلي شُنطك عندي

_ ماكُنا حنقعد في مكان جمب بيتي وقولتلك حلو

بيحاول يقلد صوتها ويقول

_ معلش يا جماعة اصلي عايزة انام، اطلعي اتخمدي بقى ومتقرفناش

_ طب اتلم طيب واتأدب 

_ ايه يا فيروز انتي لسه نايمة ولا ايه 

بتبصله فيروز ..

حست انها تقيلة وملهاش لازمة
كانت روح بتتاوب ..
حط صالح ايده في جيبه

_ يلا حسيبكوا انا بقى .. سلام
ردت فيروز
_ باي باي

بيدخلوا العمارة فيروز وروح ..

وبيمشي صالح

بترجع روح جري

_ ياصاالح، يا صالح .. انت يابني

_ ايه يا بنتي بالراحة الناس نايمة

- تعالا الصُبح نفطر سوا، وهاتلنا آيس كريم

_ آيس كريم الصُبح ؟

_ انا نفسي فيه .. جيبلي انا طيب وبلاش انت

_ ايه الرخامة دي .. اطلعي فوق امشي

_ ماشي .. سلام

بيطلعوا .. 

بتفتح روح الشقة ..

- يلا ادخلي

_ لا، انا حرجع انام مع البنات 

_ ايه ده ليه ؟

_ سيبيني على راحتي ..

_ ماشي اللي يريحك، ابقى تعالى افطري معانا

ابتسمت فيروز، بس ابتسامة قلق وزعل

_ ربنا يسهل، تصبحي على خير .

دخلت روح ..

سابت الشُنط جمب الباب ..

مسكت الموبيل 

وكتبت 

" اياك في يوم تقرر تروح تاني، لو عايز فعلاً تروح تاخدها معاك، أصل روح مش حتعرف تعيش من غير التنين بتاعها، فاكر .. ؟ 
تصبح على فطار لذيذ ..

وبالمناسبة انا بستعطفك عشان الآيس كريم مش حُباً فيك يعني . اكيد .