روح صاحية من بدري بتجهز الفطار ومبسوطة وفي الشقة مزيكا صوتها عالى بتدي نشاط ..
الساعه قربت على 9 ..
هي عارفة انه مش بيصحى الوقت ده بس هي صاحية مبسوطة
بتتصل بالتليفون
_ ايه يا صالح مش شايف الساعه بقت كام ؟
الساعه داخلة على 12 ده حيبقى غدا مش فطار يا عم
_ ينهار 12 !!
_ اها خلصني بقى
_ حاضر ربع ساعه وحبقى عندك
_ طيب
قفلت وقعدت تضحك، مش مصدقة انها قلبت على دور الامهات
وهو مكشفهاش .
قامت تكمل بقيت الحاجة اللي بتحضرها
كان الموبيل بيرن
_ ايه يا صالح تاني ؟
_ بتشتغليني يا روح ؟
قعدت تضحك
_ انا صاحية من بدري والفطار حلاوته الصبح
_ ارحمينا بس من كلامك ده ع الصبح
_ طب جي ؟
_ اها اومال حنام تاني بعد القلق ده
_ أوكيه .. سلام
قفلت روح، سرحت شوية ..
مسكت الموبيل وكتبت
( صباح الخير .. ) وداست ( إرسال )
طلعت روح بصينيه كبيرة مليانة اطباق كلها ساندوتشات
خبطت على البنات ..
فتحت فيروز بتدعك عينها من النوم
_ مفيش غيرك هنا ولا ايه ؟
_ لا في بس كله نايم، انهارده اجازة يا روح !
_ اوكيه، مش حنفطر ونصحى بدري عشان انهارده اجازة
وبعدين الساعه 9
_ مين اللى بيتكلم ؟
_ بطلي مُناهدة .. خدي من هنا 3 اطباق واعملوا شاي وكلوا ..
انا عاملة بسكوت بالشوكلاته اللي بتحبوه .
حنزل أصبح على ليلى .
فوقي يا بنتي ده ايه ده
بتتاوب فيروز
_ ماشي ماشي ..
بتقفل الباب
بتنزل روح لـ ليلي
_ صباح الخير يا سُعاد .. ليلى صحت ؟
_ اه من بدري هي في البلكونة
_ حلو قوي خدي ده ومتعمليش فطار وانا دخلالها
ماشية بتنادي في الشقة
_ يا لولو يا حلوة ..
_ روح، تعالى انا هنا
بتدخلها البلكونة
_ قاعدة بتعاكسي مين من البلكونة يا شقيه مش كبرتي ولا ايه ؟
بتبوسها من خدها
_ بعاكس بتاع اللبن ولسه مجاش .
_ اوبااااااه بقى كده
_ جعانة من بدري وسعاد لسه معملتليش حاجة
_ انا جيبالك صالح نفطر سوا، مش كان حيهرب مني الجزمة ده
_ يهرب يتجوز يعني ؟
_ يتجوز ! والله ياريت يهرب يسافر
_ طب ما هي هي ..
على الاقل السفر حيبقى حر، انما في الجواز عمره محيكون حُر .
سرحت روح ..
_ روح انتي بتحبي صالح ؟
_ اه أكيد .
_ مقصدش الصُحاب والكلام بتاع اليومين دول . فهماني صح
_ اه فهماكي بس ..
بيرن التليفون ..
_ ثواني يا لولو
بتدخل روح من البلكونة
_ صباح النور .. كويسة الحمد لله، انهارده ..؟؟
طيب حشوف .. غالباً .
حرد عليك قبلها بساعة . سلام
بتدخل روح البلكونة ..
_ ايه ده صالح تحت اهو
يا صالللللللح يا صالح
بتنادي عليه بصوت عالى وبتشاورله بدراعها كله .
عمال يشاورلها انها تسكت ..
وهي ولا هي هنا
_ اطلع عند لولو نفطر معاها
بيشاورلها بأيده انه فهم وموافق
_ بقولك ايه انا حقول لسعاد تجهز الفطار وانا حطلع اجيب كام حاجة من فوق ونازلة ماشي ؟
طلعت روح ..
وقابلت صالح على السلم .
ابتسم صالح ..
_ ايه الضفيرة دي ؟
_ مالها ؟
_ للشعر الطويل، بطلي تقلدي بقى
كشرت روح بهزار
_ خليك في روحك
_ مانا مركز معاكي اهو .
_ بتمسك روح الضفيرة، بتستغل اني عزباء وبتغازلني
_ يا شيخة اتعدلي بس، اغازل ايه، معندكوش مرآيات في بيتكوا ؟
بتضرب روح صالح على كتفه ..
_ ادخل ادخل .. موكوسة اللي تصاحب حد زيك .
_ قبل ماندخل لـ ليلى بس، ليه مفطرناش سوا ؟
_ ايه ..؟
كان بيبصلها بصة حلوة خلت روح سكتت
اول مرة تشوفه راجل غريب
قلبها دق .
فاقت من اللي هي فيه
خلعت حتفها من كفه اللي ماسكها
_ مفيش انا قولت بقالها كتير ماشافتناش بس .. يلا عشان هي وانا جعانين
دخلت روح ووراها صالح ..
_ احنا جينا ..
بتقوم ليلي من على الكرسي
_ اخيراً .. ازيك يا صالح ..؟
_ خليكي عندك احنا حنفطر في البلكونة
_ طيب .. تعالا يا صالح
دخل صالح يسلم على ليلى
_ اقعد اقعد عايزة احكيلك حاجة قبل ما روح تيجي
بيسحب صالح الكرسي جمب ليلي ومخضوض شوية
_ خير ..؟
_ ما تتخضش بس، بُص يا صالح ..
انا بعتبر روح دي بنتي اللي مجبتهاش
وانت ربنا يعلم انا بحبك ازاي
انت اكتر حد بحس روح مبسوطة معاه
حتى فارس اللي هي طلعالي بيه مش بتحبه
انا عارفة .
البنت دي في لمعة في عينها كده بتبان .
مبتطلعش لفارس ابداً .
انت محبتهاش ؟
سكت صالح مش عارف المفروض يرد يقول ايه ..
_ الصراحة .. في الفترة الأخيرة ..
في دخلة روح
_ انا جيييييييت اخيراً
زغدت ليلي صالح في ايده
ولاحظت روح
_ في ايه ؟ بتنموا على مين من غيري
_ مفيش اقعدي عايزة اكل
_ الصراحة وانا جعان
بيمد ايده صالح ياكل
كان الجو جميل
هزار وضحك ..
_ بالمناسبة انا حشوف فارس انهارده
سكت صالح
_ طب حلو
_ انت مالك بتقولها من تحت ضرسك كده ليه ؟
_ لأ، مفيش .. اصل انا كنت ناوي اقضي اليوم معاكي .. معاكوا يعني .. كلكوا
_ بصت ليلى لصالح ..
بصة معناها انها فهمت باقي الكلام اللي روح دخلت وقطعته .
_ بس احنا متفقناش غير على الفطار
_ تمام .. تمام .. قشطة يعني انزلي .
انا كده كده عندي كام حاجة محتاجة تتظبط
ويدوبك ألحق بقى .
بيقوم صالح يغسل ايده
بتروح وراه روح .
تقفله على الباب ..
_ انت شايف ان كده انت طبيعي يعني ؟
_ وانتي مش شايفة انك انانية ؟
_ انانية مرة واحدة !
مبيردش عليها ..
_ انا انانية يا صالح ؟
بيروح ينشف ايده ويرجعلها ..
_ انتي كمان مش ملاحظة ده ؟ اوعي عايز اعدي
_ استنى بس، انا عملت ايه
كل ده عشان حشوف فارس ومش حقعد معاك
_ لأ .. لأ كده فهمتي غلط
فارس ايه اللي اتضايق منه
هو احنا مش صحاب بس ولا ايه ؟
_ اه طبعاً صُحاب بس .. انت بتسأل ده ليه ! مش وقته اصلاً
_ انتي مش بتفكري غير في سعادتك
عايزة كل حاجة معاكي وحواليكي
ومبتراعيش حاجة
ومقولتيش حاجة، بتفاجئيني واكني برا حياتك اصلاً !!!
_ ده لسه مكلمني قبل ما تطلع
_ تقومي تغيري خطتك، وتفطرينا مع ليلى
وتقولي كده واحنا مبسوطين
انتي ايه !!
احنا مش على مزاجك يا روح !!
ومش عايز كلام خلاص .
بعد اذنك
بيعدي من جمبها
بيطلع يلاقي ليلى في الطرقة كانت بتسمعهم
ووشها متدايق
غمضتله عينها براحة
ابتسملها وخبط على كتفها
_ سلام .
نزل وقفل الباب وراه
بتلف روح
بتلاقي ليلي
_ شوفتي المجنون ده !
_ صالح مش مجنون يا روح .
بتلف ليلي تدخل اوضتها
_ انتوا كلكوا عليا ولا ايه
انا سيبهالكوا ..
بتطلع روح وتسيب الباب مفتوح
بتقابل فيروز على السلم
_ صباح الخير ..
مبتردش روح وتطلع تفتح باب شقتها وتهبدها .
نزلت فيروز ..
لقت الباب مفتوح
_ صباح الخير يا سعاد هو في ايه ؟
_ ست روح متخانقة مع صالح
ابتسمت فيروز
_ ليه ؟
بصتلها سُعاد بغيظ ..
_ معرفش، وعن اذنك عندي شُغل
_ طيب .. ححود على ماما ليلى بعد الشُغل
_ مدام ليلى تعبانة ودخلت تنام .. عن اذنك
بتنزل فيروز وهي مبسوطة
وبتقول بصوت عالى
_ مالها دي .
